„Не сум декор во политички театар“ – советничка на ЗНАМ од Прилеп ја напушти коалицијата

Советничката на ЗНАМ во Советот на Општина Прилеп, Мирјана Стеваноска, соопшти дека излегува од владејачката коалиција и дека натаму ќе настапува како независна советничка.

Стеваноска рече дека одлуката ја донела водејќи се од интересите на граѓаните на Прилеп.

Таа, која на последните локални избори беше носителка на советничката листа на ЗНАМ, пред советниците порача дека довербата што ја добила од граѓаните е обврска што не смее да се изневери.

„Во изминатиот период покажав дека не прифаќам политика на молк, слепо гласање и немо прифаќање на однапред договорени одлуки. Советникот не треба да биде декор во политички театар, туку активен и принципиелен глас на граѓаните“, изјави Стеваноска.

Според неа, Советот наместо место за аргументирана расправа се претворил во простор каде што само формално се потврдуваат политичките интереси на една партија.

Нејзиното напуштање на коалицијата доаѓа една недела откако Миле Цеков ја напушти пратеничката група на ЗНАМ и парламентарното мнозинство, најавувајќи дека ќе дејствува како независен пратеник.

Share on Facebook

Tweet

Follow us

Save