Осум граѓански организации бараат Владата да го разреши директорот на Агенцијата за остварување на правата на заедниците

Осум граѓански организации бараат од Владата итно да ја преиспита одговорноста и да го разреши директорот на Агенцијата за остварување на правата на заедниците, Далибор Китановиќ.

Барањето следува по објава споделена од Китановиќ на социјалните мрежи, во која, со пораките „За крст часни и слободу златну“ и „Генерали небеске војске“, биле прикажани личности поврзани со четничкото движење, меѓу кои и Дража Михајловиќ и Ратко Младиќ, кој е правосилно осуден за геноцид, злосторства против човештвото и воени злосторства.

Од организациите велат дека објавата не може да се смета само за приватен став, бидејќи станува збор за директор на јавна институција чија надлежност е остварување, унапредување и заштита на правата на припадниците на помалубројните заедници.

„Од директорот на Агенцијата се очекува да придонесува кон меѓуетничката доверба, еднаквоста и заедничкото живеење. Величањето личности и идеологии поврзани со прогон, асимилација, воени злосторства и геноцид е неспоиво со мандатот и одговорноста на функцијата“, се наведува во барањето.

Граѓанските организации предупредуваат и на можната загриженост кај вработените во Агенцијата кои припаѓаат на заедниците што ги опфаќа нејзината работа. Тие прашуваат дали вработените можат да се чувствуваат безбедно и достоинствено во работна средина предводена од директор кој јавно споделува вакви содржини.

Од Владата се бара да ја испита политичката, етичката и институционалната одговорност на Китановиќ, да донесе одлука за негово разрешување, да преземе мерки за заштита на вработените и јавно да се огради од величањето на осудени воени злосторници и идеологии што поттикнуваат национална и верска омраза.

Барањето е доставено и до Јавното обвинителство, од кое се бара по службена должност да ја испита содржината и контекстот на објавата и да утврди дали постојат елементи на кривично дело согласно член 407-а од Кривичниот законик.

Организациите нагласуваат дека проценката за евентуална кривична одговорност е исклучиво во надлежност на органите на прогонот и судот.

Иницијативата е доставена и до Комисијата за спречување и заштита од дискриминација и до националниот координатор за меѓуетничка и меѓуресорска соработка, Салко Куч.

„Ова не е прашање на дневна политика, етничка припадност или приватно убедување. Ова е прашање на цивилизациски вредности, владеење на правото, почитување на жртвите и одговорност на носителите на јавни функции“, порачуваат потписниците.

Барањето го потпишаа НВО „Шадрван“, НВО „Диван“, Институтот за истражување и анализа на политики „Ромалитико“, НВО „Диванхана“, НВО „Легис“, НВО „Смарт код“, Бошњачкиот национален совет и Бошњачката културна заедница.

Share on Facebook

Tweet

Follow us

Save