Петмина опозициски градоначалници осудени на затвор до 23 години во Турција

Турски суд осуди петмина опозициски градоначалници на затворски казни во траење од речиси шест до над 23 години, по обвиненија поврзани со корупција.

Градоначалниците, кои беа уапсени во периодот од јануари до јули минатата година, се членови на Републиканската народна партија (ЦХП). Во изминатата година, партијата беше предмет на низа истраги и апсења.

Градоначалникот на истанбулската општина Бешикташ, Риза Акполат, беше осуден на 23 години и три месеци затвор по обвиненија, меѓу кои и за манипулирање со јавни набавки, поткуп и перење пари.

„Невин сум. Во овој случај нема конкретни докази. Сè се темели на искази на клеветници“, изјави Акполат пред судот во Силиври, западно од Истанбул, пренесе агенцијата АНКА.

Градоначалникот на јужниот град Адана, Зејдан Каралар, беше осуден на шест години и три месеци затвор за поткуп.

Турските медиуми објавија дека Кадир Ајдар, градоначалник на општината Џејхан во провинцијата Адана, добил пет години и десет месеци затвор.

Судот го ослободи од обвиненијата Абдурахман Тутдере, градоначалник на југоисточниот град Адијаман. Поранешниот градоначалник на истанбулската општина Есенјурт, Ахмет Озер, доби условна казна од осум месеци и десет дена за злоупотреба на службената положба.

Сите обвинети, вклучително и бизнисменот Азиз Ихсан Акташ, беа ослободени од обвиненијата за раководење, помагање или учество во криминална организација. Судот оцени дека не е докажано извршувањето на наводните кривични дела.

Во процесот, кој привлече големо внимание во јавноста, беа опфатени околу 200 обвинети. Турските медиуми го нарекоа „случајот Акташ“, според името на бизнисменот кого обвинителството го обвинуваше дека ја предводел наводната криминална мрежа. Обвинителството за него бараше казна до 280 години затвор.

ЦХП стана водечка политичка сила на локалните избори во Турција во 2024 година, нанесувајќи сериозен удар на владејачкиот сојуз на претседателот Реџеп Таип Ердоган.

Оттогаш, десетици опозициски градоначалници низ земјата се уапсени и отстранети од функциите.

Претставници на опозицијата ја обвинуваат владата дека го користи судскиот систем за пресметка со политичките противници. Анкара ги отфрла овие обвинувања.

Процесот се одвива во услови на засилен притисок врз опозициските политичари.

Откако со судска одлука беше отстранет избраниот лидер на ЦХП, Озгур Озел, во јули тој основа нова политичка формација наречена „Јени Парти“, односно „Нова партија“.

Градоначалникот на Истанбул, Екрем Имамоглу, поранешен член на ЦХП кој премина во „Нова партија“, беше уапсен минатата година под обвиненија за корупција. Тоа се случи на денот кога беше номиниран за кандидат на претседателските избори закажани за 2028 година.

Неговото апсење предизвика најголем бран антивладини протести во Турција во последните години.

Share on Facebook

Tweet

Follow us

Save