Политико: Ретклиф ја посети Москва за да ја предупреди Русија за балтичките земји и Иран

Директорот на ЦИА, Џон Ретклиф, ја искористи ненајавената посета на Москва за да ја предупреди Русија за можна ескалација кон балтичките членки на НАТО, но и да побара намалување на поддршката за Иран, објави Политико, повикувајќи се на извори запознаени со разговорите.

Според медиумот, Ратклиф им рекол на руските претставници дека Москва не треба да презема никакви чекори што би можеле да доведат до влошување на односите со американските сојузници во НАТО, особено Естонија, Латвија и Литванија.

„Целта на неговиот состанок беше првенствено да ја предупреди Русија против какви било ескалациски дејствија против балтичките земји“, рече еден од изворите.

Слични наводи објавија и CBS News и Wall Street Journal, според чии извори во Вашингтон постои страв дека Москва би можела да го тестира единството на НАТО и подготвеноста на САД да ги бранат своите сојузници. Сепак, американската страна јавно не презентираше докази дека Русија подготвува напад врз една од членките на Алијансата.

Друга важна тема на разговор, како што тврди Politico, бил Иран. Ретклиф наводно се обидел да ја убеди Русија да ја ограничи воената и економската поддршка за Техеран во време кога Вашингтон ги засилува санкциите и политичкиот притисок врз иранските власти. Ниту ЦИА ниту руската страна официјално не потврдија дека е разговарано за ова прашање.

Ретклиф пристигна во Москва на 25 август, без претходна најава. Неговото пристигнување првпат го објави дописничката на CBS News, Џенифер Џејкобс, откако американски воен транспортен авион беше забележан на московскиот аеродром, а потоа и дипломатски конвој на улиците на руската престолнина.

Тоа беше првата позната посета на Ретклиф на Русија откако беше назначен за директор на ЦИА и, според Axios, највисок функционер во администрацијата на американскиот претседател Доналд Трамп во Москва од јануари.

Портпаролот на Кремљ, Дмитриј Песков, потврди дека Ретклиф разговарал со претставници на руските разузнавачки служби, но нагласи дека средба со претседателот Владимир Путин не е ниту планирана, ниту одржана.

Песков додаде дека Путин бил информиран без одлагање за резултатите од контактите, но не ја откри нивната содржина. Кремљ ги смета овие разговори за корисни, иако, како што изјави портпаролот на рускиот претседател, прерано е да се каже дали тие можат да придонесат за излегување на руско-американските односи од длабока криза, објави Тасс.

Share on Facebook

Tweet

Follow us

Save