САД и Иран блиску до меморандум, Женева се споменува како можно место за потпис

САД и Иран се приближуваат до можен дипломатски договор што би можел да донесе смирување на повеќемесечната криза меѓу двете земји.

Според Ројтерс, меморандум за разбирање меѓу Вашингтон и Техеран би можел да биде потпишан најрано во недела во Женева. Сепак, договорот сè уште нема официјална потврда од иранска страна, а Техеран порача дека конечна одлука не е донесена.

Иранското Министерство за надворешни работи соопшти дека разговорите продолжуваат и дека земјата нема да отстапи од своите „црвени линии“. Од таму посочуваат дека шпекулациите за времето и местото на евентуалното потпишување се предвремени.

Американскиот претседател Доналд Трамп претходно изјави дека е можен „голем договор“ со Иран и дека документот би можел да биде финализиран во наредните денови. Извештаите доаѓаат во пресрет на самитот на Г7, кој од 15 до 17 јуни се одржува во Евиан, Франција, во близина на Женева.

Според досегашните информации, документот би бил меморандум за разбирање, а не конечен мировен договор. Тој би требало да отвори нова фаза на преговори за безбедносните прашања, санкциите, пловидбата низ Ормутскиот Теснец и идните разговори за иранската нуклеарна програма.

Аксиос објави дека рамката што се разгледува предвидува повторно отворање на Ормутскиот Теснец, олеснување на дел од санкциите под услов Иран да ги почитува договорените обврски, како и продолжување на примирјето за 60 дена за да се овозможат натамошни преговори.

И покрај оптимизмот во Вашингтон, ситуацијата останува неизвесна. Главната пречка е тоа што Техеран официјално нема потврдено дека е постигнат конечен договор, а дел од спорните прашања, меѓу кои замрзнатите ирански средства и регионалната безбедност, сè уште се предмет на преговори.

Доколку меморандумот биде потпишан, тоа би било најзначајниот дипломатски чекор меѓу САД и Иран во последните години и можен почеток на поширок процес за смирување на тензиите на Блискиот Исток.

Share on Facebook

Tweet

Follow us

Save