САД: Македонија е дел од стратешките интереси на Балканот – Пофалби за енергетските и инфраструктурните проекти

Американскиот Стејт департмент денеска претстави значаен стратешки пресврт во својата надворешна политика кон Западен Балкан, официјално изјавувајќи дека ерата на градење држави преку надворешни интервенции завршила.

Во своето писмено сведочење пред Поткомитетот за Европа во американскиот Конгрес, заменик-помошникот државен секретар Даниел Лотон јасно стави до знаење дека официјален Вашингтон повеќе нема да обезбедува „неограничени средства за неопределени цели“.

Тој ги повика балканските лидери да ги напуштат старите несогласувања и самите да изнајдат прагматични решенија за своите проблеми. Според документот, новата политика на САД во регионот ќе се темели на три главни столба: зачувување на стабилноста, проширување на американските економски интереси и борба против транснационалниот организиран криминал кој директно ја загрозува безбедноста на САД.

Во извештајот се издвојуваат јасни пораки за земјите од регионот.

Косово: Критики за институционалните доцнења и повик за заштита на Србите

Вашингтон ја потврди силната поддршка за независноста и територијалниот интегритет на Косово, но изрази отворена загриженост поради забавувањето на внатрешните процеси. Лотон истакна дека заедничката агенда е попречена од повторените избори, владите кои долго време се во технички мандат и доцнењата во формирањето на институциите.

Понатаму, во изјавата се изразува загриженост поради „прекумерното правно и полициско постапување кон српското население во Косово“, при што се бара сите граѓани да уживаат еднакви права со цел да се зачува стабилноста.

Во меѓувреме, присуството на КФОР останува од витално значење и ќе продолжи да биде поддржано од американските сили.

Албанија: Воено партнерство и удар врз наркокартелите

Албанија е опишана како близок сојузник во НАТО со кој САД тесно соработуваат во разбивањето на криминалните организации кои соработуваат со картелите од Западната хемисфера.

Преку неодамна финализираниот кредит за странско воено финансирање (FMF), САД ќе ѝ помогнат на Албанија да ја модернизира својата армија и да ги зголеми набавките на опрема произведена во САД.

Србија: САД стануваат „префериран партнер“

Документот открива значително приближување на САД кон официјален Белград со цел ограничување на влијанијата на ривалските странски сили, како Русија и Кина.

По Стратешкиот дијалог меѓу САД и Србија, одржан во јули, Вашингтон ја гледа Србија како клучна земја за регионалниот баланс и ја зголемува соработката во областа на енергетиката, одбраната и трговијата.

Дијалогот Косово-Србија е во застој

Во однос на односите меѓу Приштина и Белград, САД оценуваат дека најголем напредок е постигнат во рамките на Вашингтонскиот договор од 2020 година, со посредство на претседателот Трамп за време на неговиот прв мандат.

Сепак, актуелниот дијалог, олеснет од ЕУ, е во застој поради „недостиг на политичка волја од двете страни“.

САД бараат продолжување на директните разговори без предуслови и избегнување провокации.

Босна и Херцеговина, Северна Македонија и Црна Гора

Во Босна и Херцеговина, американската дипломатија оценува дека спречила сериозна криза со обезбедување повлекување на антидејтонското законодавство од страна на Република Српска.

Од друга страна, Mакедонија и Црна Гора се пофалени за нивните инфраструктурни и енергетски проекти за поврзување, вклучително и за течниот природен гас (LNG), кои отвораат нови можности за инвестиции од американски компании.

Share on Facebook

Tweet

Follow us

Save