Се огласи шпанскиот премиер по големата железничка несреќа со жртви

Шпанскиот премиер Педро Санчез ги откажа денешните обврски поради железничката несреќа во близина на Урда во покраината Толедо, а во објава на X посочи дека е „потресен од сериозната железничка несреќа во Толедо“.

„Службите за итни случаи работат на местото на настанот за да им помогнат на патниците кои беа погодени. Сите мои мисли се со жртвите и нивните семејства“, напиша Санчез.

Портпаролот на шпанската влада изјави дека Санчез ќе отпатува во Урду, најблиското место до железничката несреќа, за да понуди поддршка.

-Претседателот на (шпанската) влада, Педро Санчез, патува во Урду за да им пружи поддршка на тимовите на службите за итни случаи кои работат на местото на несреќата и да им испрати поддршка на повредените и нивните семејства – објави шпанската влада, според Гардијан.

Шпанската влада изјави дека приоритет е да се грижи за жртвите и да се обезбеди максимална координација меѓу надлежните институции. Шпанскиот крал Фелипе VI и кралицата Летиција објавија дека ги следат информациите за несреќата.

– Длабоко сме тажни и загрижени за железничката несреќа во Урда (Толедо). Ја споделуваме болката со семејствата и најблиските на оние што ги загубија животите и им испраќаме искрена поддршка на повредените и на сите погодени“, изјавија шпанскиот крал и кралица.

Регионалната влада на Андалузија прогласи тридневна жалост.

„Потресени сме. Цела Андалузија е со жртвите од оваа најнова железничка несреќа – изјави претседателот на Андалузија, Хуанма Морено.

Градоначалникот на Севиља, Хозе Луис Санц, претходно денес, исто така прогласи тридневна жалост и ги откажа сите официјални настани.

Бројот на загинати во железничката несреќа што се случи утрово во близина на станицата Урда, во шпанската покраина Толедо, се искачи на 64, според извори од владата на Кастиља-Ла Манча.

Уште 80 лица се повредени во несреќата, од кои 50 добиле сериозни повреди, додека извори од централната влада наведоа дека причина за несреќата е човечка грешка, пренесува Паис. Претседателот на Кастиља-Ла Манча, Емилијано Гарсија-Паж, стравува дека бројот на жртви може да биде уште поголем.

Шпанија е меѓу водечките земји во брзиот железнички сообраќај. Во текот на последните неколку децении, Шпанија значително инвестираше во брзите железници, кои од страна на синдикатот на шпанските железнички работници се дефинирани како пруги наменети за возови што се движат со брзина од најмалку 250 километри на час, што ја прави една од водечките земји во светот во оваа област.

За повеќе од три децении, Шпанија изгради околу 3.900 километри брзи железници за своите 49 милиони жители. Според податоците од Меѓународната унија на железници, само Кина има поголема мрежа на брзи железници, со околу 45.000 километри за 1,4 милијарди жители.

Share on Facebook

Tweet

Follow us

Save