Седум аеродроми затворени по ерупциите на вулканот Анак Кракатау, на над 270.000 патници летовите им се пренасочуваат

Седум аеродроми во Индонезија, вклучувајќи два што ја опслужуваат Џакарта, денеска останаа затворени поради вулканската пепел од ерупциите на Анак Кракатау. Пепелта од вулканот, кој се наоѓа меѓу островите Јава и Суматра, ја прекри Џакарта и неколку околни области и предизвика сериозни нарушувања во воздушниот сообраќај.
Министерството за транспорт соопшти дека повеќе од 270.000 луѓе се погодени од доцнење, пренасочување или откажување на околу 2.300 летови.

Главниот аеродром во Џакарта треба да остане затворен до 18 часот по локално време, заедно со уште шест аеродроми, додека еден аеродром во Јужна Суматра повторно е отворен. Министерот за транспорт Дуди Пурвагандхи изјави дека поради променливите временски услови засега не може со сигурност да се утврди кога нарушувањата ќе завршат.

Експертите предупредуваат дека ветерот ја разнесува пепелта богата со сулфур и силициум, која може да претставува сериозен ризик за авионските мотори, а надлежната агенција оценува дека веројатноста за нови ерупции останува висока.
Властите ги повикаа граѓаните да носат маски на отворено за да избегнат вдишување вулканска пепел, а училиштата во Џакарта и Лампунг ќе преминат на настава од далечина.

Анак Кракатау е еден од околу 130 активни вулкани во Индонезија, а неговата ерупција во 2018 година предизвика цунами во кое загинаа повеќе од 400 луѓе.

Share on Facebook

Tweet

Follow us

Save