СИЉАНОВСКА-ДАВКОВА: БУГАРИЈА ГИ ДРЖИ ВО ЗАЛОЖНИШТВО ЕВРОПСКИТЕ ИНТЕГРАЦИИ НА МАКЕДОНИЈА

Претседателката Гордана Сиљановска-Давкова изјави дека европските перспективи на Македонија се држат како заложник од страна на Бугарија, која бара уставни измени со кои бугарското малцинство би било експлицитно признаено во Уставот.

„Ние сме шампиони во менување на Уставот – 26 пати. Повеќето од измените ни се наметнати“, изјави Сиљановска-Давкова на маргините на Самитот за проширување на „Еуроњуз“, одржан во вторникот.

Претседателката, која е на функцијата од 2024 година, оцени дека понатамошни отстапки не можат да се наметнуваат без поддршка од граѓаните.

„Мојот легитимитет произлегува од граѓаните и ним им припаѓа. Па како можам да ви ветам дека ќе го смениме Уставот?“, рече Сиљановска-Давкова.

Од Македонија се бара да го измени Уставот и експлицитно да ги вклучи Бугарите меѓу заедниците што се признаени во земјата. Оваа промена беше договорена како дел од компромисот за деблокирање на пристапниот процес, но наиде на отпор во Скопје.

Во 2022 година, Европската Унија го усвои компромисниот предлог под француско посредништво. Македонија се согласи да го измени Уставот и да ги признае Бугарите како малцинска заедница, но за усвојување на измените е потребно двотретинско мнозинство во Собранието, кое актуелната влада го нема обезбедено.

Претседателката изјави дека 80 отсто од граѓаните се против уставните измени, додавајќи дека предложените амандмани сè уште не ја поминале ниту првата фаза во собраниската Комисија за уставни прашања.

Според Сиљановска-Давкова, главната пречка за европската интеграција на Македонија не е недостигот од реформи или неисполнувањето на барањата на ЕУ, туку, како што оцени, недостигот од политичка волја кај соседните земји.

Македонија, мала балканска држава со околу 1,8 милиони жители, ја предводи коалициска влада на чело со конзервативни партии, која е на власт од средината на 2024 година и располага со стабилно парламентарно мнозинство. Сепак, нејзиниот пат кон членство во ЕУ останува блокиран поради долгогодишниот спор со соседна Бугарија.

Земјата поднесе барање за членство во ЕУ во 2004 година, а официјален кандидатски статус доби во 2005 година. Оттогаш, нејзиниот напредок беше попречуван од низа политички пречки.

Сиљановска-Давкова оцени дека спорот околу европската интеграција е дел од подолгата историја на отстапки што Македонија ги направила во обидот да стане членка на Унијата.

Како пример го посочи Договорот со Грција од 2018 година, со кој државата го промени името од Република Македонија во Република Северна Македонија, со што беше ставен крај на повеќедеценискиот спор што ги блокираше амбициите за членство во НАТО и ЕУ.

Најновото барање за уставни измени, според претседателката, отвора прашање до каде треба да оди една земја-кандидат за да ги задоволи билатералните спорови пред да стане членка на Унијата.

Сиљановска-Давкова порача дека и понатаму ќе се залага за решение преку дијалог и надминување на политичките разлики со соседите.

„Неколкупати се сретнав со претходните претседатели и со актуелниот премиер. Ги изразив истите чувства и истата напнатост и ќе продолжам да го правам тоа, но исклучиво преку дијалог“, изјави таа.

Сепак, претседателката не ја обвини директно Бугарија дека намерно го блокира пристапувањето на Македонија во ЕУ, туку повика на „прагматизам“ и „поголема политичка подготвеност“ кај соседните земји.

Share on Facebook

Tweet

Follow us

Save