Словенија планира построги услови за странци, за семејство ќе треба 2.200 евра

Словенија подготвува значително построги услови за престој на странски државјани, а меѓу најголемите промени е зголемувањето на приходот што ќе треба да се докаже при добивање дозвола за престој и при спојување на семејство.

Предлог-измените на Законот за странци се подготвени од словенечкото Министерство за внатрешни работи и јавна управа и сè уште се во законодавна процедура. Официјалната eUprava наведува дека предлогот на 20 август бил испратен на меѓуресорско усогласување.

Една од најспорните промени се однесува на средствата што странскиот работник мора да докаже дека ги има за престој во земјата. Сегашниот праг од околу 507 евра месечно, според предложеното решение, би се зголемил на 1.014 евра.

Уште повисок е прагот кога странец сака да го спои семејството во Словенија. Според пресметките на словенечките организации кои го анализирале предлогот, потребни би биле 1.014 евра месечен нето-приход за носителот на дозволата, околу 580 евра за сопружник или партнер и дополнителни околу 600 евра за секое дете.

Тоа значи дека тричлено семејство би требало да докаже нето-приход од приближно 2.200 евра месечно.

Износот е значително над приходите на голем дел од работниците во Словенија. Според последните податоци на словенечкиот Завод за статистика, просечната нето-плата кај вработените во правни лица во јуни изнесувала 1.723,31 евро, а во приватниот сектор 1.591,84 евра.

Кај вработените кај регистрирани физички лица просечната нето-плата во јуни била уште пониска и изнесувала 1.117,06 евра.

Невладините организации предупредуваат дека новите услови најсилно би ги погодиле нископлатените странски работници, меѓу кои има голем број луѓе од земјите од Западен Балкан.

Горан Лукиќ од словенечката Работничка советувалница предупредува дека голем дел од странците веќе сега имаат нето-приход под прагот што се предлага, а дополнителното зголемување би можело сериозно да го отежне нивниот легален престој и животот со семејството.

Предлогот предвидува и уште една значајна промена. Периодот по кој странец би можел да побара спојување со семејството, според информациите објавени од словенечките медиуми и невладини организации, би се продолжил од една на три години.

Правниот центар за заштита на човековите права предупредува дека со ваквите измени на странците би им било потешко да добијат дозвола за престој врз основа на работа, студирање и семејно обединување и отвора прашање дали дел од предложените решенија се усогласени со европските правила за семеен живот.

Предлогот доаѓа во период кога новата словенечка влада на премиерот Јанез Јанша најавува построг пристап кон миграциската политика. Јанша повторно ја презеде функцијата на 4 јуни 2026 година, кога беше избрана новата словенечка влада.

Доколку измените бидат усвоени во предложената форма, за голем број странски работници прашањето повеќе нема да биде само дали можат да најдат работа во Словенија, туку дали нивната плата е доволно висока за во земјата легално да живеат и со своето семејство.

Share on Facebook

Tweet

Follow us

Save