Турција ги предупреди Грците: Воздржете се од нови провокации

Турскиот министер за надворешни работи Хакан Фидан предупреди дека Анкара ја смета милитаризацијата на грчките острови во Егејското Море за безбедносна закана, додека тензиите меѓу двете соседни земји растат.

„Не сакаме Грција да стане алатка во рацете на оние што сакаат да го дестабилизираат регионот и да го турнат во хаос. Сакаме да одржуваме добрососедски односи“, рече Фидан за време на вчерашната посета на Азербејџан. Сепак, тој додаде дека Атина ги прекршува меѓународните договори со одржување воено присуство на одредени острови.

„Милитаризацијата на островите кои имаат статус на демилитаризирана зона претставува закана за нас. Ги повикуваме нашиот сосед и сојузник да ги исполнуваат обврските што произлегуваат од меѓународните договори на позрел начин и во духот на сојузништвото. Грција не смее да ги оптоварува бројните безбедносни предизвици со кои се соочува нашиот регион со нови провокации“, истакна тој.

Иако и двете земји се членки на НАТО, Грција и Турција со децении се во спор околу низа билатерални прашања, вклучувајќи ги поморските граници, преклопувачките барања за континенталниот гребен и долготрајниот спор околу Кипар.

Тензиите меѓу Атина и Анкара неодамна се зголемија, особено по зајакнувањето на врските меѓу Грција и Израел, што турскиот претседател Реџеп Таип Ердоган го смета за обид за „опколување“ на Турција.

Претходно овој месец, Грција упати официјален протест до Анкара поради прогласувањето „национални“ морски паркови од страна на Турција. Атина ги смета за „неважечки и без правно дејство“ бидејќи тие се протегаат на области надвор од турската јурисдикција и внатре во грчкиот континентален гребен.

Грчкиот премиер Киријакос Мицотакис го покрена ова прашање на средбата со претседателот на Европскиот совет, Антонио Коста, во Атина. „Мојата земја е мирољубива и не претставува закана за никого. Сепак, нема да прифати некој да ѝ кажува како да ги зајакне своите одбранбени капацитети“, нагласи Мицотакис.

Share on Facebook

Tweet

Follow us

Save