INFOMAX.MK

Јеменските Хути истрелаа ракети кон комплексот на претседателската палата во јужниот град Аден, при што загинаа пет луѓе. Во меѓувреме, коалицијата предводена од Саудиска Арабија наведе десетици напади на Хутите врз саудиската инфраструктура во последните недели, пренесува „Гардијан“.

Нападот беше прв врз палатата Ал-Маашик во Аден во рамките на актуелниот конфликт меѓу Хутите, кои се блиски до Иран, и Саудиска Арабија. Палатата е седиште на јеменската влада, која ја поддржува Саудиска Арабија и која е меѓународно призната.

„Јеменскиот премиер Шаја ал-Зиндани и членовите на владата се безбедни по нападот“, изјави јеменскиот министер за информации Моамар ал-Еријани.

Сведоци за „Ројтерс“ изјавија дека слушнале силни експлозии во близина на палатата. Јеменската влада соопшти дека во нападот биле употребени ракети и беспилотни летала.

Јеменскиот министер за здравство Касим Бухаибех соопшти дека во нападот загинале пет лица, а 16 биле повредени. Меѓу жртвите има припадници на обезбедувањето и цивилни вработени.

Воениот портпарол на Хутите, Јахја Сари, изјави дека нивните борци го бомбардирале она што тој го опиша како штаб на саудиските воени операции во Аден, во рамките на декларираната политика на групата за напади врз „саудиските засилувања, каде и да се наоѓаат“.

„Франс прес“ објави дека јеменски владин министер, кој сакал да остане анонимен, изјавил дека нападот врз палатата погодил команден центар на коалицијата предводена од Саудиска Арабија. Според него, командниот центар бил погоден со три ракети, а штабот на коалициските сили во комплексот на претседателската палата со две ракети. Тој додал дека има јеменски и саудиски жртви, но не навел точен број.

Борбите меѓу бунтовниците Хути и коалицијата предводена од Саудиска Арабија се интензивираа во рамките на судирите поврзани со американско-израелската војна против Ира, а хуманитарните организации предупредија дека условите во Јемен брзо се влошуваат.

Судирите ги усложнија напорите за завршување на пошироката војна со Иран и дополнително ги потресоа глобалните пазари, додека Саудиска Арабија, една од најголемите светски извознички на нафта, се соочува со повторени напади. Погоден е и регионалниот воздушен сообраќај, бидејќи бунтовниците ги предупредија авиокомпаниите во врска со користењето на саудискиот воздушен простор за напади. Илјадници летови низ кралството се нарушени.

Советот за безбедност на ОН во четвртокот издаде заедничко соопштение во кое ги осуди „ескалирачките“ напади на бунтовниците Хути, поддржани од Иран, врз Саудиска Арабија, вклучително и „неодговорните напади“ врз аеродромот во Ријад.

Меѓународниот аеродром во саудиската престолнина бил цел на напади 20 пати од почетокот на месецот. Во напад минатиот викенд загинале 13 лица, а повеќе од 300 биле повредени.

Во заедничкото соопштение, Советот за безбедност „најостро ги осуди континуираните и ескалирачки напади на Хутите врз Кралството Саудиска Арабија“, како и „континуираните напади и закани на Хутите врз комерцијалниот поморски сообраќај во Црвеното Море и теснецот Баб ел-Мандеб“.

Претходно во четвртокот, коалицијата предводена од Саудиска Арабија, која се бори против Хутите, соопшти дека пресретнала крстосувачка ракета над провинцијата Медина. Платформата за следење летови „Флајтрадар24“ објави дека десетици летови на аеродромот во Џеда биле откажани или одложени.

Во соопштението на коалицијата не беше наведено кој е одговорен за нападот. Воениот портпарол на Хутите негираше дека бунтовниците го извеле. Групата претходно вети дека нема да ги напаѓа аеродромите во светите градови Мека и Медина во Саудиска Арабија.

Саудиска Арабија соопшти и дека уништила беспилотно летало над источната провинција на земјата, голем регион за производство на нафта, како и дека пресретнала дрон во Хамис Мушаит, во близина на голема воена воздухопловна база.

Претходно оваа недела, Саудиска Арабија соопшти дека седиштето на нафтениот гигант „Сауди Арамко“ било цел на напади на Хутите и пријави оштетувања на зградата.

Во самиот Јемен, борбите повторно ја разгореа разорната граѓанска војна по четири години релативно затишје. Една од главните причини за загриженост е градот Таиз, третиот по големина во Јемен, кој е под опсада на Хутите, каде што жителите почнуваат да се соочуваат со недостиг од основни животни потреби, пишува „Гардијан“.