Косово: Селекцијата на депортираните од САД ќе се врши според безбедносни критериуми

Привремената косовска влада објави дека изборот на 50 лица што ќе бидат преселени во Косово по депортацијата од Соединетите Американски Држави ќе се спроведе во соработка со американските власти, земајќи ги предвид националната безбедност и јавниот ред.

Обврската е дел од одлуката на привремената косовска влада, усвоена на 11 јуни, за понуда на привремена заштита на државјани од трети земји депортирани од територијата на САД.

Еден ден претходно, Врховниот суд на САД ѝ дозволи на администрацијата на претседателот Доналд Трамп веднаш да ги продолжи депортациите на мигранти во земји различни од нивните земји на потекло, привремено укинувајќи ја судската наредба со која се бараше мигрантите да имаат можност да ја оспорат депортацијата.

Во разговор за РСЕ, портпаролот на привремената косовска влада, Перпарим Криезиу, рече дека случаите на пристигнувања во Косово ќе бидат разгледани поединечно од Министерството за внатрешни работи, додека привремената заштита ќе трае до една година. Во тој период ќе бидат оценети условите во земјата од каде што доаѓаат овие лица и ќе бидат преземени мерки за нивно доброволно враќање.

„Врз основа на нашето важечко законодавство, Државата Косово им нуди на лицата под привремена заштита основни услови за живот, што вклучува сместување, храна, облека и хигиенски пакети, како и пристап до здравствена заштита, вклучително и итна медицинска помош и лекување на болести“, рече Криезиу.

Тој вели и дека Косово има претходно искуство во обезбедување привремена заштита на граѓани од трети земји.

Примерите вклучуваат преселување на авганистански граѓани во 2021 година, во соработка со НАТО и САД, како и прифаќање на украински новинари преку програмата „Новинари во престој“. Според портпаролот Криезиу, овие искуства докажуваат дека косовските институции се подготвени и способни да управуваат со вакви процеси.

Тој рече дека привремената влада ги смета САД за „цврст сојузник“ и изразува благодарност за нивната континуирана помош и поддршка, особено на патот на Косово кон евроатлантската интеграција. Американскиот Стејт департмент ја поздрави одлуката на Косово да ги прифати депортираните лица, велејќи дека САД се благодарни на Косово.

Share on Facebook

Tweet

Follow us

Save