Путин нуди прекин на нападите само на денот на изборите во Украина

Рускиот претседател Владимир Путин е подготвен да нареди прекин на нападите врз Украина на денот кога би се одржале украинските претседателски избори, изјави портпаролот на Кремљ, Дмитриј Песков. Москва, сепак, го отфрли барањето на украинскиот претседател Володимир Зеленски за 60-дневен прекин на огнот.

„Ако Киев навистина сака да одржи избори, претседателот на Руската Федерација ќе биде подготвен да издаде наредба да не се вршат напади врз Украина на денот на изборите. Поточно, на денот на изборите“, изјави Песков.

Зеленски претходно порача дека Украина е подготвена да организира претседателски избори доколку Русија прифати целосен 60-дневен прекин на огнот, кој според Киев е неопходен за подготовка и безбедно спроведување на гласањето.

Кремљ го одби предлогот, наведувајќи дека Москва не бара привремено примирје, туку долгорочен мировен договор.

„Не ни треба примирје, туку траен мир за многу идни генерации“, порача Песков.

Москва тврди и дека Украина би можела да го искористи подолгото примирје за прегрупирање и обновување на своите воени капацитети.

Претседателските избори во Украина требаше да се одржат во 2024 година, но беа одложени поради воената состојба. Украинското законодавство не дозволува одржување избори додека е во сила воена состојба.

Така, позициите на Москва и Киев остануваат различни – Украина бара 60 дена целосен прекин на огнот за организирање избори, додека Русија нуди прекин на нападите само на самиот ден на гласањето.

Share on Facebook

Tweet

Follow us

Save