Русија му нареди на естонскиот амбасадор да си замине

Русија го намали нивото на дипломатските врски со Естонија и му рече на својот амбасадор Маргус Лајдре да ја напушти Москва до 7 февруари. Потегот доаѓа откако Естонија побара од Москва да го намали персоналот на нејзината амбасада во Талин.

Руското Министерство за надворешни работи во понеделникот рече дека „естонското раководство намерно го уништува целиот комплекс на билатерални односи“.

„Талин ја издигна целосната русофобија и одгледувањето непријателства кон нашата земја на ниво на државна политика“, се вели во соопштението.

Овој месец, естонските власти ѝ порачаа на Русија драстично да го намали персоналот во нејзината амбасада во Талин до 1 февруари. „Со оглед на тоа што персоналот на руската амбасада не работи на подобрување на естонско-руските односи среде агресивна војна, веруваме дека сегашната големина на руската мисија е неоправдана“, рече тогаш естонскиот министер за надворешни работи Урмас Реинсалу.

Портпаролката на руското Министерство за надворешни работи Марија Захарова го осуди барањето да се намали нејзиниот дипломатски персонал во Талин.

„Не е тајна дека Естонија е една од земјите кои се најнепријателски настроени кон Русија“, рече таа тогаш.

Руската амбасада во Талин минатата недела соопшти дека активностите на естонските власти спречиле таа да функционира нормално и довело до „прекини во конзуларните услуги“.

Share on Facebook

Tweet

Follow us

Save