Трамп стана првиот жив претседател на американска монета во оптек

Американската ковачница на пари (US Mint) потврди дека пушти во оптек нова монета од еден долар со ликот на Доналд Трамп. Со оваа одлука, тој стана првиот жив американски претседател во историјата чиј лик се наоѓа на монета наменета за секојдневна употреба. Ковачницата им порача на граѓаните да внимаваат на ситните пари во продавниците, додека колекционерите веќе можат да купат специјални пакувања преку официјалните дистрибутивни канали.

Продажбата за колекционери веќе започна преку специјализирани сетови. Ролна од 25 монети се продава по цена од 61 долар, додека вреќичка со 100 парчиња чини 154,50 долари.

Во секојдневниот промет монетата тешко ќе се забележи. Американците со децении ретко користат метални долари и речиси целосно се потпираат на хартиените банкноти.

За колекционерскиот пазар е подготвена и ограничена серија. На Денот на независноста, 4 јули, исковани се точно 250.000 примероци со посебен печат „July 4th“. Овие парчиња се случајно распределени во редовните продажни пакувања.

Иако во јавноста популарно се нарекува „златен долар“, монетата воопшто не содржи злато. Изработена е од 88,5 проценти бакар, со помал удел на цинк, манган и никел. Целата серија е искована во Филаделфија и нема стандардна ознака на ковачница.

Предната страна ја дизајнираше главниот гравер Џозеф Мена, користејќи официјален претседателски портрет. Ликот на Трамп е прикажан речиси фронтално, придружен со традиционалните натписи „LIBERTY“ и „IN GOD WE TRUST“, заедно со годините 1776 – 2026. На задната страна се наоѓа претседателскиот печат, дело на поранешниот главен гравер Френк Гапаро, надополнет со бројот 250 во чест на два и пол века од основањето на Соединетите Американски Држави.

Share on Facebook

Tweet

Follow us

Save