Албанија забрзува кон ЕУ: Уште едно поглавје пред затворање

Албанија на 13 октомври во Луксембург ќе ја одржи десеттата Меѓувладина конференција со Европската Унија, на која се очекува привремено затворање на Поглавје 20 – „Претпријатија и индустриска политика“.

Поглавјето ги опфаќа политиките за развој на претприемништвото, конкурентноста, поддршката за малите и средните претпријатија, подобрувањето на инвестициската клима и индустриската трансформација.

Со неговото привремено затворање ќе биде потврден напредокот на Албанија во усогласувањето со европските стандарди и во зајакнувањето на институционалните капацитети за спроведување на овие политики.

Албанија досега има привремено затворено три преговарачки поглавја – 25 „Наука и истражување“, 26 „Образование и култура“ и 30 „Надворешни односи“. Поглавје 20 би било четвртото.

Сите 33 преговарачки поглавја со Албанија веќе се отворени, а процесот сега постепено преминува во фазата на нивно затворање.

Албанските власти оценуваат дека напредокот во Поглавје 20 е важен и за подобрување на деловната клима, привлекување инвестиции и поголема интеграција на економијата со Единствениот европски пазар.

Меѓувладината конференција во Луксембург ќе биде уште еден чекор во пристапните преговори на Албанија со ЕУ, кои официјално започнаа во јули 2022 година.

Share on Facebook

Tweet

Follow us

Save