Американка две години лажела дека е болна од рак — од 200 луѓе собрала 40.000 долари

Жена од Флорида, САД, лажирала дијагноза за рак две години и собрала над 40.000 долари од повеќе од 200 луѓе, но истрагата открила дека целата приказна била измама. Марибет Елен Џонс (51) од Бонита Спрингс е уапсена оваа недела и е обвинета за голема кражба, пишува „Унилад“.

Според канцеларијата на шерифот на округот Колиер, од 2022 до 2024 година, Џонс ги натерала луѓето да веруваат дека е болна. Таа работела како лидер на активности во станбена заедница во областа Нејплс, каде што собирала и пари.

Истражителите утврдиле дека таа добивала донации преку онлајн кампањи, во готово и преку лични чекови. Таа била обвинета за голема кражба помеѓу 20.000 и 100.000 долари.

За да ја направи приказната што е можно поубедлива, Џонс систематски градела лажна слика за болеста. Таа им кажувала на познаниците дека нејзината состојба се влошува и дека редовно оди на терапија. Во еден момент, соседите дури и ѝ ја избричиле главата, верувајќи дека се подготвува за хемотерапија.

Истрагата открила дека таа ги користела парите за да отплати лични долгови.

Share on Facebook

Tweet

Follow us

Save