Ацевски: Мега-паркот во Ново Село е направен врз контаминирана почва, сите дрвја се исушени!

Како депонијата во Ново Село, голема колку 11 фудбалски игралишта, е исчистена со депонирање на само 160 метри кубни отпад депонирани во јавното претпријатие „Дрисла“, прашува кандидатот за градоначалник на Општина Ѓорче Петров од СДСМ, Костадин Ацевски во гостување во „Студио 10“ на ТВ24.

– „Во однос на депонијата во Ново Село нека објасни градоначалникот како ја исчистија депонијата голема колку 11 фудбалски игралишта со само 160 метри кубни отпад депонирани во Дрисла. Каде е отпадот? Каков е тој мега-парк врз депонија? Дали градоначалникот бил во тој мега-парк? Дрвјата се исушени поради контаминираната почва, дали има употребна дозвола тој мега-парк, дали има елаборат, дали има технички прием?“ – прашува Ацевски.

Ацевски побара актуелниот градоначалник, Александар Стојкоски, да покаже документи за количината на отпад исчистен од депонијата во Ново Село и истакна дека ќе се повлече од трката за градоначалник доколку се приложи доказ дека од депонијата се исчистени повеќе од 160 метри кубни отпад.

– „Докажете дека е исчистено повеќе, извадете белешки. Јас ќе се повлечам од градоначалничката трка доколку докажете дека се исчистени повеќе од 160 метри кубни отпад од депонијата во Ново Село“, вели Ацевски.

Share on Facebook

Tweet

Follow us

Save