Бајден одби да ја прогласи Русија за држава спонзор на тероризмот

Американскиот претседател Џо Бајден изјави дека Русија не треба да биде етикетирана како држава спонзор на тероризмот.

Ова е ознаката за која се залагаше Киев среде руската инвазија на Украина, додека Москва предупреди дека евентуалното вклучување на Русија на списокот на земји кои го спонзорираат тероризмот ќе биде точка од која нема враќање од дипломатска гледна точка и поттик за целосен прекин на односите меѓу двете земји.

На прашањето дали Русија треба да биде означена како државен спонзор на тероризмот, Бајден им рече на новинарите во Белата куќа во понеделникот: „Не“.

Американски законодавци се залагаа и Русија да ја добие оваа ознака, потсетува „Гардијан“. Директорот на Одделот за Северна Америка при Министерството за надворешни работи на Русија, Александар Дарчиев, ја коментираше иницијативата во американскиот Конгрес Русија да се прогласи за „спонзор на тероризмот“.

– Доколку биде усвоен, тоа би значело дека Вашингтон би ја преминал точката од која нема враќање, со многу сериозна колатерална штета на билатералните дипломатски односи, кои би биле драстично намалени или дури и прекинати. Американската страна е предупредена – изјави тогаш Дарчиев за ТАСС.

Вакви иницијативи имаше и порано, пред инвазијата на Украина, како на пример кога во 2018 година државниот секретаријат требаше да размисли за додавање на Русија на листата на спонзори на тероризмот, заедно со Иран и Сирија.

Share on Facebook

Tweet

Follow us

Save