Блинкен: 45 милиони долари за помош на западноафриканските земји

Американскиот државен секретар Ентони Блинкен вети денеска дополнителни 45 милиони долари за помош во борбата за стабилност и против конфликтите во западноафриканските земји, каде нестабилноста е зголемена во последните години поради бунтовите на џихадистите, пренесува Танјуг.

Блинкен денеска е во Абиџан на втората станица од неговата турнеја низ четири африкански земји – Зеленортските Острови, Брегот на Слоновата Коска, Нигерија и Ангола, пренесува Ројтерс.

Целта на неговата турнеја од 21 до 26 јануари е да разговара со африканските лидери за американско-африканското партнерство во областа на трговијата, климата, инфраструктурата, здравството, безбедноста и други. Оваа турнеја е продолжение на самитот во Вашингтон одржан со африканските лидери во декември 2022 година.

Безбедносните предизвици во Западна Африка, последиците од минатогодишниот државен удар во Нигер и зголеменото влијание на Русија во регионот се меѓу клучните теми на турнејата на Блинкен низ овие западноафрикански држави.

Share on Facebook

Tweet

Follow us

Save