Брисел деблокира 90 милијарди евра помош за Киев

Европската Унија се очекува утре да донесе клучни одлуки за доделување финансиски пакет од висина од 90 милијарди евра за Украина, наменет за поддршка на Киев во периодот 2026-2027 година.

Оваа информација ја потврди високата претставничка на ЕУ за надворешни работи и безбедносна политика, Каја Калас, по пристигнувањето на состанокот на Советот за надворешни работи што се одржува во Луксембург, објави Ројтерс.

„Во среда ќе донесеме важни одлуки за 90 милијарди евра за Украина“, рече Калас, оценувајќи дека оваа помош е клучна за одбраната на земјата, но и јасна порака до Москва дека Русија „не може да ја надживее Украина“.

Овој значаен финансиски пробив беше овозможен откако владата во заминување на унгарскиот премиер Виктор Орбан се согласи да ги деблокира европските фондови. Со ова заврши долгоочекуваната неизвесност што го попречуваше долгорочното планирање на економската и воената помош од Брисел.

Според најавите, средствата ќе бидат пласирани во форма на поволни заеми, гарантирани од земјите членки, со што ќе се обезбеди стабилноста на украинските јавни финансии во следните две години.

Иако некои членови изразија загриженост за дополнителното оптоварување на заедничкиот буџет, постигнатиот компромис со Будимпешта го отвори патот за конечното „зелено светло“ да биде формализирано утре.

Покрај украинското прашање, шефицата на европската надворешна политика нагласи дека фокусот на министрите ќе биде и на ситуацијата на Блискиот Исток.

Калас во исто време нагласи дека ЕУ силно ги поддржува дипломатските решенија за конфликтот меѓу Иран и Израел, но предупреди дека безбедносните ризици, вклучувајќи ги војната, сајбер и ракетните закани, мора да бидат „широко разгледани“.

Share on Facebook

Tweet

Follow us

Save