Британец со деменција по 25 години живеење во Шведска доби рок од 10 дена да ја напушти земјата

На 74-годишниот Британец Хорас Мејсон, кој повеќе од две децении живее во Шведска и поради тешка деменција има потреба од постојана нега, му е наредено да ја напушти земјата во рок од десет дена.

Мејсон, познат како Џорџ, во Шведска живее околу 25 години, каде што се преселил за да биде блиску до својот син и внуците. Денес е неподвижен и сместен во дом за лица со деменција, каде што му е потребна помош во речиси секојдневен аспект од животот.

Шведскиот миграциски суд на 23 јули ја потврдил одлуката за негова депортација, оценувајќи дека државниот интерес за регулирана имиграција има предност пред неговиот интерес да продолжи да живее во Шведска.

Синот на Мејсон, Карл, вели дека неговиот татко поради болеста тешко ја разбира ситуацијата.

„Ме прашуваше што ќе се случи, дали ќе дојде полиција, дали ќе ја разбијат вратата и каде ќе оди во Англија. Тоа е нехумано“, раскажал тој.

Семејството пред судот приложило медицинска документација со која се потврдува дека Мејсон има напредната васкуларна деменција, васкуларен паркинсонизам и други сериозни здравствени проблеми. Тие се повикале и на правото на приватен и семеен живот гарантирано со член 8 од Европската конвенција за човекови права.

Сепак, судот оценил дека соодветна грижа за лица со деменција постои и во Обединетото Кралство, каде што Мејсон има и ќерка. Семејството, пак, тврди дека таа не е во можност да се грижи за него, додека неговиот син Карл е лицето кое во моментов ја обезбедува потребната поддршка.

Постапката за неговата дозвола за престој започнала во 2021 година, но шведската миграциска служба го одбила барањето. По жалбите, случајот стигнал до повисокиот миграциски суд, кој конечно ја потврдил одлуката за депортација.

Карл сега се обидува да го продолжи случајот пред Европскиот суд за човекови права во Стразбур, додека британската влада соопштила дека е запознаена со случајот и дека е во контакт со шведските власти.

Случајот повторно го отвори и прашањето за положбата на британските државјани кои живееле во Шведска пред Брегзит. Според податоците наведени во извештајот, Шведска до крајот на 2024 година одбила 3.918 од 14.233 поднесени барања за престој, односно околу 27,5 проценти. Активистите сметаат дека тоа е значително построг пристап во споредба со другите земји членки на ЕУ.

Share on Facebook

Tweet

Follow us

Save