INFOMAX.MK

Повеќе од 8.700 луѓе загинаа во разорните земјотреси што во понеделникот ги погодија јужните делови на Турција и Сирија. Сите очи се вперени во спасувачите кои се борат да ги извлечат преживеаните од урнатините. Помош пристигнува од целиот свет, а свој придонес има и Македонија.

Инфраструктурата во Турција е значително оштетена, гасот не работи, на приодите до најзагрозените места има огромни гужви, а на овој дел од земјата се спушта снежна бура, велат последните информации оттаму.

Турскиот кризен штаб соопшти дека во земјотресот во Турција загинале најмалку 6.234 лица, а повредени се 37.011 лица.

Во потрагата по преживеани учествуваат 79.000 луѓе.

Бројот на жртвите во Сирија надмина 2.500, покажуваат податоците на државните медиуми и спасувачките служби кои оперираат во делот од земјата под контрола на бунтовничките сили.

Во тој дел од земјата загинале 1.280 луѓе, а 2.600 се повредени.

Нема сомнеж дека бројот на жртви значително ќе се зголеми бидејќи стотици семејства се под урнатините.

Во делот од земјата под контрола на владините сили загинаа 1.250 лица, а 2.054 беа повредени.