INFOMAX.MK

Мартин Лутер Кинг беше баптистички свештеник од САД, активист за граѓански права и еден од најголемите лидери за правата на црното население во САД. Голем противник на војната, ненадминат пацифист. Роден е во Аталанта на 15 јануари 1929г., а живееше до 4 април 1968г. кога му беше извршен атентат при што беше убиен.

Тој е еден од најзначајните личности во поновата историја на САД и се смета за еден од највлијателните поборници на ненасилството, а многу луѓе ширум светот го почитуваат како херој, миротворец и маченик. Како признание на неговата истакната улога во американската историја, во прв ред поради неговата улога за здобивањето на афроамериканците со основните човекови и граѓански права, во 1986, во негова чест, беше прогласен државен празник во САД, наречен Ден на Мартин Лутер Кинг, кој се празнува третиот понеделник во јануари секоја година.
Кој е Мартин Лутер Кинг?

Тој беше човек кој имаше сон. Да, токму така, тој беше човек со сон и визија. Човек кој пред сите други ја видел ветената земја за онеправданите афроамериканци во САД, човек кој јавно соопшти дека афроамериканците ќе стигнат во таа земја и дека ќе бидат среќни и конечно со чувство за еднаквост, а не дискриминирани. Како големт борец за човекови права на црнците во 50-тите и 60-тите години од 20 век, Мартин Лутер Кинг, неуморно се бореше за социјална правда и за прекинување на расната дискриминација и отфрлање на сегрегацијата меѓу црните и белите во САД. Со својата голема харизма и инспиративните говори што ги држеше инспирираше десетици илјади луѓе во САД и насекаде во светот да учествуваат во ненасилни директни акции за да ја подигнат свесноста на луѓето од владите на конкретните држави.

Со своите ставови и идеали ги промени мислењата на многу луѓе и покрена револуција за човекови права. Со искреност и доборонамерност ги допираше и освојуваше срцата на сите онеправдани и ги придобиваше во големата борба против направдата практикувајќи ненасилство. Кога држеше говори пред стотици илјади граѓани, тој не се користеше со манипулации. Напротив, секогаш употребуваше факти и аргумени, со кои убедуваше дека постојниот неправеден ситем треба да се менува. Кога влијаеше на широките народни маси, тоа го правеше во интерес на сеопштото добро на луѓето, а не за свој личен интерес. Луѓето ги мотивираше и ги повикуваше да се борат за остварувања на своите неотуѓиви права. Ја критикуваше војната со Виетнам и жестоко ја напаѓаше милитантната политка на САД. На тој начин придобиваше стотици илјади луѓе во борбата против војна и во залагањата за граѓански права на онеправданите и сиромашните. Беше голем, најголем борец против расизмот во САД и против тогашната актуелна сегрегација, т.е. поделба на американското општество.

Иако доби Нобелова награда, како израз на вреднување и прифаќање на неговото дело и на неговата личност од страна на прогресивната светска јавност, тој имаше голем број непријатели во САД, од редовите на радикалните националисти, од идеолозите на сегрегацијата и расизмот во САД, Некои екстремисти од тие редови и извршија атентат врз него на 4 април 1968г. во хотелот во Тенеси, Мемфис, каде што беше сместен. На неговата надгробна плоча испишан е стихот од духовната песна “Конечно слободен“, кој гласи: Конечно слободен, конечно слободен, ти благодаран семоќен Господе, конечно сум слободен“.

Како успеа да го постигне сето тоа?

Со совјата активност привлече големо внимание, факт кој не и беше по воља на тогашната власт во поделеното американско општество. Власта го тепаше, без потреба, го понижуваше на срамен начин, и како израз на својата немоќ, безброј пати го затвораше. Буквално му се потсмеваа и го навредуваа. Тој беше посилен и похрабар од сите претставници на американската власт, од екстремистите, од расистите. Беше упорен, непоколеблив, нескршлив во своите намери за правда и цели за поправедно демократско и слободно општество. Општество на еднакви и слободомислечки луѓе. За време на целиот свој граѓански активизам проповедаше само љубов и ненасилство. Омилени методи му беа протестните маршеви, обвинувачките демонстрации и методата “sit in“(да се седи на места каде на црнците им беше забрането – во ресторани, хотели, паркови, автобуси и слично).

Мартин Лутер Кинг знаел и умеел да гледа на работите од поинаква перспектива: од перспективата на сиромашните, невработени црнци кои се обидувале да најдат работа со исти услови како и нивните бели соседи; од онаа на сиромашните бели работници, кои се грижеле да ги издржат нивните фамилии; и од онаа на претседателите и политичарите кои се обидувале да задоволат различни делови од гласачите. Токму затоа што овој голем ум можел да гледа, покрај од своја и од туѓа перспектива, тој постигнал големи успеси во своето дејствување.

Сотир Костов