(Видео) Масовен напад со дронови врз Москва, погодена голема нафтена рафинерија

Москва и поширокиот московски регион во текот на ноќта беа цел на еден од најголемите напади со беспилотни летала досега, при што беше погодена и московската нафтена рафинерија во Капотња.

Според „Ројтерс“, очевидци слушнале експлозии во Москва, а од подрачјето на рафинеријата утрово се издигале големи облаци чад, објави 4news.mk Московскиот градоначалник Сергеј Собјанин соопшти дека неколку беспилотни летала стигнале до комплексот на рафинеријата, но засега не е познат обемот на причинетата штета.

Руските власти соопштија дека од саботата биле соборени повеќе од 1.600 дронови, од кои околу 450 биле насочени кон Москва. Во поширокиот московски регион загинале две лица, а околу 400 жители, меѓу кои и 70 деца, биле евакуирани од станбена зграда во областа Раменское.

Нападот се случува на последниот ден од тридневните парламентарни избори во Русија. Собјанин го обвини Киев дека нападот имал цел да го наруши изборниот процес. Украина засега не го коментирала нападот.

Московската рафинерија е еден од клучните снабдувачи со гориво за руската престолнина и регионот, објави 4news.mk Според последните достапни податоци, во 2024 година преработила околу 11,6 милиони тони нафта и произвела 2,9 милиони тони бензин и 3,2 милиони тони дизел.

Објектот и претходно беше цел на напади. Во јуни годинава по напади со беспилотни летала беа оштетени капацитети за примарна преработка, а производството беше привремено прекинато.

Share on Facebook

Tweet

Follow us

Save