INFOMAX.MK

Илјадници приврзаници на поранешниот бразилски претседател Жаир Болсонаро упаднаа во Конгресот во главниот град денес, барајќи воена интервенција за соборување на претседателот Луис Инасио Лула да Силва, кој положи заклетва на функцијата пред една недела. Демонстрантите се искачија преку полициските бариери и стигнаа до врвот на покривот на Конгресот, кршејќи го стаклото од неговите прозорци.

Демонстрантите кои го поддржуваат пучот стигнаа до срцето на моќта во Бразилија Штабот на армијата. Приврзаниците, исто така, успеаја да ги заобиколат безбедносните барикади за да упаднат во Врховниот суд и претседателската палата. До 17 часот (по локално време), полицијата ја врати контролата врз седиштето на Врховниот суд, но демонстрантите останаа во комората на Конгресот и во палатата Планалто, официјалното работно место на претседателот на Бразил.

Екстремистите, од кои повеќето носеа жолти и зелени маици – боите на бразилското знаме – одбиваат да го прифатат поразот на Болсонаро на изборите во октомври минатата година.

Нападот врз центрите на моќ во Бразил претставува сериозен предизвик за новиот левичарски претседател, кој популарно е познат како Лула. Претседателот попладнево требаше да го посети Араракуа, град во внатрешноста на државата Сао Паоло, кој беше погоден од обилните дождови во последните неколку дена.

Нападот во Бразилија потсетува на нападот врз американскиот Капитол пред две години. Меѓутоа, во овој случај, бразилскиот Конгрес не заседаваше кога беше нападнат од демонстранти. Новата седница на Конгресот ќе се состане во февруари. Болсонаро моментално се наоѓа во Орландо, Флорида во САД. Минатата недела тој отпатува во американскиот град со цел да ја избегне инаугурацијата на Лула, каде што, според протоколот, требаше да го постави претседателскиот појас на новиот лидер.

Последните информации велат дека националната гарда се повлекува под притисокот на демонстрантите.