Владата предлага нов Закон за оружјето: Ограничување на бројот на парчиња, контрола на Airsoft и забрана за одредени полуавтоматски оружја

Владата до Собранието достави нов Предлог-закон за оружјето со кој целосно се заменува постојниот закон што е во примена од 2005 година. Наместо нови измени и дополнувања, предлагачот се одлучил за целосно ново законско решение, образложувајќи дека досегашниот закон бил менуван 15 пати и повеќе не ги следи европските стандарди и современите безбедносни потреби.

Според образложението, законот е усогласен со најновата европска директива за контрола на набавувањето и поседувањето оружје, а предвидува и низа новини за физичките и правните лица кои поседуваат или тргуваат со оружје.

Една од најзначајните новини е ограничувањето според кое физичко лице ќе може да поседува најмногу десет парчиња оружје со дозвола, додека исклучок ќе има само за активните спортски стрелци кои ги исполнуваат законските услови.

Со новата категоризација, автоматското оружје, електричните парализатори, гасното оружје, оружјето маскирано како друг предмет и одредени видови воена муниција ќе бидат ставени во категоријата на забрането оружје. Во истата категорија влегуваат и одредени полуавтоматски оружја со рамки со голем капацитет.

Пиштолите, револверите, ловечките и спортските пушки, како и одредени видови пневматско оружје ќе можат да се набавуваат само со претходно одобрение од Министерството за внатрешни работи.

За првпат детално се регулираат и Airsoft и Paintball направите, кои ќе мора да бидат пријавени и евидентирани. Во истата категорија се вбројуваат и лансерите на пепер спреј, како и деактивираното оружје.

Предлог-законот носи и новини поврзани со муницијата. Физичко лице ќе може да набавува најмногу 500 куршуми годишно за оружје со жлебени цевки, освен ако не докаже оправдана потреба за поголема количина.

Меѓу новите решенија е и воведувањето на европска дозвола за огнено оружје, документ кој ќе служи како доказ за сопственост и право на користење на оружјето и ќе биде усогласен со европските стандарди. Законот првпат предвидува и правила за полупроизведено оружје, негови делови и технички нацрти за производство преку 3Д печатачи и CNC машини, со што се отвора можност за контрола на современите облици на нелегално производство на оружје.

Дополнително, се воведува електронско следење на оружјето од производителот до крајниот корисник, нови регистри и дигитални евиденции, како и построги правила за трговците, посредниците и трансферот на оружје преку државните граници.

Во образложението Владата наведува дека целта е да се воспостави поефикасен систем на контрола на цивилното оружје, целосно усогласен со европското законодавство и современите безбедносни стандарди.

Share on Facebook

Tweet

Follow us

Save