INFOMAX.MK

Информација за обилните врнежи на територијата на Македонија до 08:00 часот

РЦУК – Битола известува дека во Општина Ресен, како последица на обилните врнежи, дошло до излевање на реките Болнска и Источка во селата Царев Двор и Дрмени, со што се поплавени над 50 куќи, магацински простори, визби и земјоделски површини.

Ангажирани се екипи на јавни претпријатија и приватни фирми со вкупно 4 багери, 7 пумпи и повеќе приватни пумпи за црпење на вода. На регионалните патишта има наноси од земја кои се расчистуваат по приоритет.

Нивото на Голема Река е 2,1 м со почетни излевања во Долна и Горна Бела Црква.

ЈКП „Пролетер“ известува за нарушен квалитет на водата – привремено не се препорачува за пиење.

ТППЕ Ресен интервенира во с.Дрмени со 2 возила и 5 пожарникари.

Општина Битола пријавува повеќе интервенции:

– ЈП Битола работи во подпелистерските села Нижеполе, Дихово, Цапари, Породин, Жабени, Лажец, Меџитлија, Острец, Граешница и Кишава.

– ЈП „Нискоградба“ и АД Водостопанство подигаат насипи на р.Драгор кај Долно Оризари.

– На мостот во Карамани се расчистуваат гранки и отпад со цел зголемување на протокот.

– ХМС „Стрежево“ ги чисти пропустите на Цапарска река (Доленци–Лера).

– Ангажирана е целата механизација, екипите остануваат на терен и во текот на ноќта.

– Поради вода на коловоз, затворени се патиштата Лера–Доленци и кон Цапари.

– Нивото на р.Црна е зголемено на 2,7 м (во 15:30 ч).

– ЈКП Водовод – Битола работи на дефект што предизвика прекин на водоснабдување од Кравари до Меџитлија.

– Преку Е-112 пријавени се повеќе поплави на подруми, дворови, паднато дрво и ризик од излевање на канали.

Општина Демир Хисар: излевање на р.Црна кај с.Жван со поплавени земјоделски површини; екипите расчистуваат одрони на локалните патишта Базерник и Вирово – двата правци се проодни.

Општина Прилеп: преку Е-112 пријавено паднат таван на куќа на ул.„Кајмакчалан“, како последица од дождовите; известени надлежните служби.

РЦУК – Охрид: извршени повеќе интервенции на поплавени домови; по престанокот на дождот состојбата е стабилизирана, но реките и понатаму се на високо ниво.

РЦУК – Куманово:

– Во Крива Паланка и Кратово екипите расчистуваат повеќе одрони на регионалните патишта.

– Водостојот на Кратовска и Крива Река е зголемен, без пријавени излевања.

РЦУК – Скопје: нивото на реките е покачено, но состојбата е под контрола и без излевања.

РЦУК – Струмица: пријавени три одрони на патот Струмица–Валандово кои се веднаш проследени до надлежните служби.