Водата за пиење во виничките села Трстија и Трсино полна со бактерии

Водата од чешма на локалниот водовод во селото Трстија во Општина Виница има зголемена бактериолошка загаденост, а во однос на физичко-хемиските својства, исто како и кај чешма од водоводот во Трсино, регистрирана е неисправност, поради што тие воопшто не треба да се користат за пиење.

Загаденоста е утврдена со последните испитувања што ги направиле стручни екипи од Центарот за јавно здравје од Кочани. Анализите од земените примероци во вкупно девет села покажале дека во Трстија и во Трсино има зголемена присутност на калиум перманганат, поради што е неопходна претходна дезинфекција на водата за да може да се користи за пиење.

– Испитаниот примерок вода за пиење од чешма во двор во селото Трстија не одговара на законските и стручни прописи во однос на испитаните параметри за бактериолошка анализа, поради присуство на колиформни бактерии. Во однос на физичко-хемиската анализа, водата во Трстија и во Трсино не одговара на законските прописи за испитаните параметри, поради зголемена присутност на калиум перманганат. Водата не се препорачува за пиење и потребна е редовна и правилна дезинфекција за да може да се користи – се истакнува во извештајот од Центарот за јавно здравје од Кочани.

Испитувањето на примероците од локалните чешми во селата Пекљани, Драгобраште, Крушево, Калиманци, Виничка Кршла, Градец и Истибања покажало задоволителни физичко-хемиски и бактериолошки резултати.

Во писмените препораки до Општина Виница, од Центарот за јавно здравје – Кочани се нагласува дека кај сите селски водоводи е неопходна редовна дезинфекција, односно концентрацијата на резидуален хлор да се движи од 0,2 до 0,5 милиграми на литар вода.

Share on Facebook

Tweet

Follow us

Save