Воен авион се урна во Русија, загинаа шест лица

Тешка авионска несреќа со воен авион се случи во Амурската област во Русија. Во инцидентот загинаа речиси сите припадници на вооружените сили кои биле во авионот, објави УНИАН.

Според првичните податоци, во авионот се наоѓале вкупно седум лица. Шестмина од нив загинале на местото на несреќата, а едно лице било пренесено во болница со повреди од среден степен. Првичните извештаи на локалните канали укажувале на реактивен патнички Ту-154 и експлозија на гориво како можна причина, но подоцна станало јасно дека станува збор за стратешки бомбардер.

Министерството за одбрана на Руската Федерација официјално потврдило пред руските медиуми дека се урнал стратешки ракетен носач Ту-95 за време на планиран тренажен лет, како и дека загинале шест членови на екипажот.

Според мониторинг-извори, инцидентот се случил во близина на селото Краснојаново. Според неофицијални информации од канали за следење на воената авијација, авионот од типот Ту-95МС извршувал лет за преместување кон аеродромот „Олeња“ и веројатно бил вооружен со крстосувачки ракети. Ова е уште една загуба за руската авијација со долг дострел во последните месеци. На 15 јуни во Иркутската област се урна друг стратешки бомбардер – Ту-22М3.

Тогашниот инцидент се случи во близина на градот Свирск. Според официјалните податоци, летот бил извршен без борбен товар, а екипажот успеал навреме да се катапултира пред авионот да удри во земјата, забележува УНИАН.

Share on Facebook

Tweet

Follow us

Save