Во подготовка инвестиција од 74 милиони евра за модернизација на Клиничката болница во Тетово

Министерот за здравство, д-р Сашо Клековски, заедно со заменик-министерот Јовица Андовски, директорот на Фондот за здравствено осигурување Златко Перински, градоначалникот на Тетово Билал Касами, директорот на Клиничката болница Тетово, д-р Ерзен Елези, како и делегација на Светска банка и претставници на Министерството за здравство, денеска ја посетија Клиничката болница во Тетово.

На средбата бил презентиран концептот за темелна реконструкција, проширување и целосно опремување на болницата. Проценетата вредност на проектот изнесува 4,56 милијарди денари, односно околу 74 милиони евра, а конечниот финансиски модел ќе биде дефиниран по изработката на потребните анализи и документација.

Проектот предвидува реконструкција и модернизација на хируршкиот и интернистичкиот блок, изградба на нов павилјон за повеќе медицински дејности, посебен објект за гинекологија, акушерство и неонатологија, набавка на современа медицинска опрема и ИТ-системи, како и отстранување на дотраените објекти и целосно уредување на болничкиот комплекс.

„Ова е инвестиција во достоинството и сигурноста на пациентите и во подобри услови за здравствените работници. Нашата цел е граѓаните од Тетово и полошкиот регион да добиваат современа и навремена здравствена услуга блиску до местото на живеење“, истакна министерот Сашо Клековски.

Според Министерството за здравство, инвестицијата е од особено значење за околу 251.500 жители од полошкиот регион, бидејќи треба да обезбеди повеќе здравствени услуги на локално ниво, пократко време на чекање и намалување на потребата пациентите да се упатуваат на лекување во Скопје.

Во рамки на посетата, со претставниците на Светска банка биле разгледани и следните чекори за реализација на проектот, меѓу кои подготовка на физибилити студија, изработка на техничка документација, анализа на трошоците и придобивките и дефинирање на одржлив модел на финансирање.

Од Министерството посочуваат дека проектот ќе се реализира во координација со Фондот за здравствено осигурување, Општина Тетово и раководството на Клиничката болница, со цел да се обезбеди транспарентна и ефикасна подготовка во сите фази на инвестицијата.

Share on Facebook

Tweet

Follow us

Save