„Гласен текстител“: За нормален семеен живот потребни се 72.300 денари

Пресметките на „Гласен текстител“ објавени денеска покажаа дека плата за живот, а не минималец, за да има социјална правда и доволно средства за егзистенција на работниците и да се прехрани едно четиричлено семејство, потребни се 72.300 денари месечен буџет.

Според здружението,за разлика од синдикалната кошничка која во моментот достигна 60.000 денари, нивните пресметки се дека оваа сума не е доволна и се потребни минимум 72.300 денари за да се помине месецот.

Кристина Ампева изјави дека во плата за нормален живот освен стандардните параметри здравство, култура, образование, комунални услуги, се калкулираат и трошоците што едно четиричлено семејство ќе ги има за еднаш во годината да си дозволи еднонеделен одмор.

-Ние велиме дека платата треба да вклучува непредвидени трошоци. Пластично кажано, ако се расипе машината за садови или за алишта, да не се вади кредит, како што сега го правиме, туку да се има соодветна заштеда од платата и тоа е некаде околу 10 отсто, рече  Ампева.

Таа посочи дека оваа пресметка покажува дека минималната плата покрива само 29 отсто од трошоците за живот. Од друга страна, просечната плата не ја отсликува реалната состојба, зашто тоа е пресек од највисоки и најниските примања.

Таа забележува дека најблиску до плата за живот се Турција и Полска, а зад нас се Бугарија и Албанија каде минималната плата покрива едвај 20 отсто од месечните трошоци. 

Share on Facebook

Tweet

Follow us

Save