Грушко: Русија нема да прави компромиси околу НАТО во Украина

Рускиот министер за надворешни работи Александар Грушко денеска изјави дека Русија нема да прави компромиси кога станува збор за распоредување на контингенти на НАТО, ударно оружје или членство на Украина во Северноатлантската алијанса.

-Членството на Украина во НАТО, како и распоредувањето на воени контингенти и ударно оружје на нејзина територија, е апсолутно неприфатливо за нас, изјави Грушко за Спутник, додавајќи дека ставот на Москва е добро познат и е искажан многу пати претходно.

Тој нагласи дека Русија е подготвена да воспостави правно обврзувачки безбедносни гаранции со земјите од НАТО, но само на реципрочна основа.

Грушко потсети дека Москва им предложила вакви договори на Вашингтон и НАТО на крајот на 2021 година и дека тие биле одбиени во тоа време.

Заменик-министерот го критикуваше НАТО за она што го нарече конфронтациска политика и „бесконечно проширување“ на Алијансата, оценувајќи дека во моментов нема знаци дека блокот има намера да го преиспита својот став кон Русија или да се вклучи во дијалог за регионалната безбедност врз основа на принципите на меѓусебна безбедност.

-Доколку НАТО е подготвен за таков чекор, тие знаат каде да нè најдат, додаде Грушко, потсетувајќи дека Москва никогаш не одбила дијалог, додека комуникациските канали со Алијансата се замрзнати од 2014 година.

Share on Facebook

Tweet

Follow us

Save