Грција ги порази македонските кошаркарски надежи со речиси двојна разлика

Кошаркарската репрезентација на Македонија до 16 години е поразена од Грција со 48:78 во второто коло од Европското првенство А-дивизија што се игра во Скопје.

Грците уште во првата четвртина ја потврдија фаворитската улога кога воведните 10 минути ги добија до 8:25.
Високата предност, Грците ја одржуваа и во втората четвртина и на одмор заминаа со 20 поени предност (22:42)

Третата четвртина започна со серија од 1:7 на Грција, а одговорот на Македонија беше серија од 6:0 и тоа беше се што направија младите кошаркари. Грците до крајот на средбата ја зголемија предноста и на крајот славеа со 30 поени разлика 48:78.

Никола Јаничиќ со девет поени беше најпрецизен кај Македонија, додека кај победникот се истакнаа Филипос Цахцирас со 12 поени и 11 скока и Елефтериос Лиотопулос и Стилијанос Марагкудакис кои дадоа по 11 поени.

Во третото и последно коло од групна фаза, утревечер од 18.45 часот, Македонија ќе игра против Шпанија во натпревар кој ќе одлучува за второто место во групата Д.

Извор: Слободен печат

Share on Facebook

Tweet

Follow us

Save