ДЗР: Не се одржува системот кој треба да го следи финансиското работење на 40 државни институции

Нема навремено и комплетно дигитално следење на сметководствено-финансиските услуги на 40 државни институции, вклучувајќи и десет министерства преку кои минуваат речиси 19 проценти од државниот Буџет, бидејќи системот за Интегрирано планирање на ресурсите (ИПР) ниту се одржува, ниту се пополнува, ниту се контролира како што е пропишано, покажува последниот извештај на Државниот завод за ревизија.

Со овој систем управува Службата за општи и заеднички работи на Владата (СОЗР), но го користат и министерствата за економија, правда, здравство, транспорт и врски, Антикорупциската комисија, АХВ, пазарниот инспекторат, Бирото за метрологија…

Според извештајот на ДЗР, со неодржувањето и другите слабости се доведува во прашање точноста на финансиските извештаи на државните институции и безбедноста на нивните податоци.

„Овој пристап го зголемува ризикот од нецелосно евидентирање на обврските и влијае врз точноста на финансиските извештаи и извештаите за финансиската состојба, како и на квалитетот на податоците и информациите кои тие ги даваат“, велат од Државниот завод за ревизија (ДЗР) во извештајот.

Во период од цели пет години од декември 2019-та до декември 2024 година, немало валиден договор за одржување на системот, утврдиле државните ревизори.

Во извештајот пишува и дека се користат застарени оперативни системи, заеднички лозинки без двојна потврда, како и неажурирани резервни копии, а тоа се само дел од слабостите на системот за интегрирано планирање кои ги нотира ДЗР.

Share on Facebook

Tweet

Follow us

Save