INFOMAX.MK

Европската унија денеска го осуди договорот меѓу Русија и Белорусија за распоредување на руски нуклеарни боеви глави на белоруска територија.

„Тоа е чекор што ќе доведе до натамошна исклучително опасна ескалација“, се вели во соопштението на високиот претставник на Европската унија за надворешна политика и безбедност, Жозеп Борел.

Според Борел, одлуката е спротивна на она на што Русија се обврза со Меморандумот од Будимпешта, според кој Белорусија го елиминираше целото нуклеарно оружје на своја територија.

Одлуката, се додава, е спротивна на заедничката изјава на петте земји со нуклеарно оружје од 3 јануари 2022 година, дека нуклеарна војна не може да се добие и дека никогаш не смее да се води.

Ја повикуваме Русија да се држи до она што го вети“, вели Борел.

Тој, исто така, оцени дека белорускиот режим е „соучесник во незаконската, неиспровоцирана агресивна војна на Русија против Украина“ и ги повика властите во Минск „веднаш да престанат да ја поддржуваат“ таа војна и да „се откажат од одлуките кои можат само да придонесат за зајакнување на тензиите. во регионот и го поткопуваат суверенитетот на Белорусија“.