INFOMAX.MK

Демократски сојуз најостро ги осудува вчерашните протести и обидите за политичка злоупотреба на прашањето за употребата на албанскиот јазик во правосудниот систем. Велат дека особено загрижува фактот што на протестите беа присутни и граѓани од соседните држави Косово и Албанија, што претставува, како што велат, недозволив обид за надворешно влијание врз внатрешните политички и институционални прашања на Република Македонија.

-Очигледно е дека зад овие активности стои политичката агенда на ДУИ, која по губењето на власта се обидува преку националистичка реторика, етнички тензии и вештачки кризи да предизвика дестабилизација на државата и да обезбеди политички поени.

Демократски сојуз смета дека правото на употреба на албанскиот јазик мора да биде гарантирано и почитувано согласно Уставот, Охридскиот рамковен договор и законите, но истовремено мора да се зачува единствениот, функционален и ефикасен правосуден систем кој функционира на македонски јазик како службен јазик на државата.

Недозволиво е правосудството да стане поле за политички и етнички конфронтации или за создавање паралелни системи кои би ја нарушиле правната сигурност и единството на институциите, велат од таборот на Павле Трајанов.

ДС ја повикува Владата да не подлегнува на притисоци, уцени и радикални барања, туку преку дијалог и стручна дебата да изнајде европско и одржливо решение кое ќе обезбеди:

– целосно почитување на јазичните права на сите заедници;

– задолжително познавање на македонскиот јазик за носителите на правосудни функции;

– зачувување на единствениот правосуден систем и унитарниот карактер на државата.