Епископот Марко устоличен во новата Делчевско-каменичка епархија на МПЦ!

Во црквата Успение на Пресвета Богородица во Делчево вчера се одржа вечерна воскресна богослужба, како најава за денешното устоличување на епископ Марко на чело на новоформираната Делчевско-каменичка епархија. Епископот Марко на синоќешната богослужба пред присутните верници изрази благодарност за нивното присуство и воедно ги покани на утрешната литургија по повод свечениот црковен чин.

Устоличувањето на епископ Марко се случи денеска, во сослужение со свештенството од делчевско-каменичките парохии кои ги покануваат сите православни христијани, сите граѓани да присуствуваат на овој светол историски чин од значање за верата и традициите на секој еден христијанин во заедништво со Бога.

Делчевско-Каменичката Епархија е формирана со одлука на Синодот на Македонската православна црква- Охридска архиепископија на 20 јуни 2023 година и е една од 15 епархии во јурисдикција на МПЦ-ОА. Новата епархија е резултат на обединувањето на МПЦ-ОА со ПОА на довчерашниот расколник Јован Вранишковски. Обединувањето ќе значи интеграција на владиците на ПОА (Православна охридска архиепископија која работеше во рамките на СПЦ) во МПЦ-ОА. Делови од постоечките епархии на МПЦ-ОА ќе бидат поделени, а со новите епархии ќе управуваат четворица владици на ПОА. Обединувањето е дел од договорот меѓу МПЦ-ОА и СПЦ со кој беше обезбедена согласноста на Српската црква за автокефалност на МПЦ-ОА.

Изјава за локалниот медиум Делчево365 дадоа градоначалниците на Делчево и на Македонска Каменица кои упатија честитки до верниците за формирањето на новата епархија и посакаа здравје, среќа и успешна работа на епископот Марко.

Share on Facebook

Tweet

Follow us

Save