Зеленски е подготвен да разговара за неутралност на Украина, но има услови

Украина е подготвена да разговара за прифаќање на статусот на неутрална држава, како дел од мировниот договор со Русија, но за тоа се потребни гаранции од трета страна и потврда на референдум, изјави денеска украинскиот претседател Володимир Зеленски.

Тој ова го кажа во 90-минутното обраќање до руските новинари преку видео линк, а малку порано, руската Агенција за мониторинг на медиумите ги предупреди руските медиуми да се воздржат од емитување на интервјуто на Владимир Зеленски.

-Руската инвазија предизвика уништување на русофонските градови во Украина, рече Зеленски.

Штетата предизвикана од руските напади е полоша од уништувањето што го предизвикаа Русите за време на војните во Чеченија, рече тој.

-Безбедносни гаранции и неутралност, ненуклеарен статус на државата. Подготвени сме за тоа. За оваа точка од преговорите се разговара темелно, рече тој, пренесен од француските медиуми.

„Но, не сакам тоа да биде уште еден документ во стилот на Будимпешта“, рече тој, алудирајќи на договорите потпишани од Русија во 1994 година со кои се гарантира интегритетот и безбедноста на трите поранешни советски републики, вклучувајќи ја и Украина, доколку се откажат од наследеното нуклеарно оружје. од Советскиот Сојуз.

Руската и украинската делегација од утре до среда ќе одржат нова рунда директни разговори во Турција, соопшти денеска еден од украинските преговарачи, Давид Арахамија.

Украинскиот претседател денеска преку видео линк разговараше со новинари на опозициската руска телевизија Дожд, независниот портал Медуза, чии страници се блокирани во Русија и дневниот весник Комерсант.

Во кратката изјава што Агенцијата за мониторинг на медиумите ја објави на социјалната мрежа и на својата веб-страница, ги предупредува руските медиуми да не го пренесуваат интервјуто на украинскиот претседател.

„Роскомнадзор ги предупредува руските медиуми дека треба да се воздржат од објавување на тоа интервју“, наведува агенцијата, но не ја наведува причината зошто го објавува тоа предупредување.

Руското државно обвинителство соопшти дека ќе издаде правно мислење за изјавите дадени во интервјуто и за законитоста на објавувањето на тоа интервју.  (МИА)