INFOMAX.MK

Претседателот на Украина Володимир Зеленски заминува за САД, каде што ќе одржи важен разговор со својот американски колега Доналд Трамп. Се очекува средбата да се одржи на маргините на Генералното собрание на ОН во Њујорк, а во моментов дипломатските тимови на двете страни го усогласуваат дневниот ред.

Зеленски вечерва изјави дека телефонски разговарал со Трамп.

„Се договоривме да се сретнеме во Њујорк, а оваа средба може да донесе значајни промени. Постои дипломатска динамика“, рече Зеленски.

„Имаме идеи за мерки за деескалација и за фундаментални прашања поврзани со безбедноста – енергетската и прехранбената безбедност, како и заштитата на човечкиот живот. Работиме заедно со американскиот тим и подготвени сме да преземеме навистина сериозни чекори“, додаде украинскиот претседател.

Се очекува главен фокус во разговорите да бидат можностите за активирање на дипломатскиот процес за прекин на војната, безбедносните гаранции, испораката на нови системи за противвоздушна одбрана, како и обезбедувањето безбедни коридори за извоз на енергија и земјоделски производи.

Средбата доаѓа по серијата посети на американски пратеници во Киев и Москва. Според украинската страна, директната комуникација на највисоко ниво со Вашингтон создава нова дипломатска динамика и е од клучно значење за постигнување конкретни решенија за најкритичните прашања поврзани со меѓународната безбедност.

Во Њујорк се очекува и средба меѓу американскиот државен секретар Марко Рубио и рускиот министер за надворешни работи Сергеј Лавров.

Доналд Трамп утре заминува за Њујорк, каде што најпрво ќе се сретне со градоначалникот Зохран Мамдани.

Седницата на Генералното собрание на ОН започнува во вторник.