Зеленски: Русија подготвува голем бран воздушни напади врз Украина

Украинскиот претседател Володимир Зеленски повторно предупреди дека Русија подготвува голем бран воздушни напади врз Украина, повикувајќи ги граѓаните да не ги игнорираат предупредувањата за воздушна опасност.

„Разузнавачкиот извештај за можен сеопфатен напад и понатаму е актуелен“, изјави Зеленски, еден ден откако првпат предупреди за информации кои укажуваат на подготовка на масовни руски напади.

Украинскиот лидер ги повика граѓаните внимателно да ги следат воздушните тревоги и безбедносните препораки на надлежните служби.

Недостиг од ракети за противвоздушна одбрана

Иако украинските системи за противвоздушна одбрана се ставени во состојба на зголемена готовност, Зеленски призна дека земјата се соочува со проблеми во снабдувањето со западни ракети и друга опрема потребна за одбрана од балистички и крстосувачки проектили.

Украина веќе повеќе од четири години се спротивставува на руската инвазија со поддршка од западните сојузници. Војната во меѓувреме се карактеризира со интензивна употреба на беспилотни летала, ракети и други далекусежни оружени системи од двете страни.

Русија и Украина редовно изведуваат напади врз воени и инфраструктурни цели на противничката територија, при што воздушната закана останува една од најголемите опасности за цивилното население.

Share on Facebook

Tweet

Follow us

Save