Змии и гуштер шверцувани под седиште: На Богородица откриени осум живи влекачи

Царинските службеници на граничниот премин Богородица, во соработка со полицијата, спречиле нелегален внес на седум млади змии и еден гуштер во Македонија, соопшти Царинската управа.

Влекачите биле откриени при контрола на возило управувано од косовски државјанин.

Според Царината, животните биле спакувани во кутии и марами и скриени под седиштето на автомобилот.

Меѓу откриените змии имало четири питони, а најголем дел од влекачите се видови чија меѓународна трговија е строго регулирана. Во пратката била пронајдена и една отровна змија.

Животните ќе бидат предадени на надлежните институции, а против возачот е поведена соодветна постапка.

Од Царинската управа потсетуваат дека внесот и трговијата со заштитени животински видови се регулирани со Конвенцијата за меѓународна трговија со загрозени видови на дива флора и фауна – CITES, за што се потребни соодветни дозволи.

„Секој внес без овие дозволи се смета за недозволен внес“, порачуваат од Царинската управа.

Share on Facebook

Tweet

Follow us

Save