INFOMAX.MK

Русија го обвини украинскиот генерал Кирило Буданов (37), шеф на воената разузнавачка служба ГУР, за тероризам и го стави на листата на најбарани лица.

„Киев пост“ објави дека Буданов бил обвинет во отсуство за терористички дела поврзани со повеќе од 100 напади со беспилотни летала на руска територија и на Крим, украинска територија анектирана од Русија.

– Убеден сум дека Кирило Буданов не обрнува внимание на ваквите пропагандни заблуди – рече Андриј Јусов, портпарол на ГУР

„Киев пост“ наведува дека Буданов е поранешен командос кој брзо се проби до самиот врв на украинското воено разузнавање и стана генерал на 35-годишна возраст.

Тој лично тврди дека бил цел на најмалку десет руски атентати врз него, од кои во еден, при експлозија на автомобил, бил тешко ранет.

Украинскиот медиум наведува дека поради нападите со дронови, покрај Буданов, за тероризам се обвинети и командантите на украинските воздухопловни сили, морнарицата и 383-та беспилотна воздухопловна бригада.