Иран стои цврсто зад својата нуклеарна програма пред клучната средба со ЕУ тројката

Иран ќе ги брани своите легитимни права врз нуклеарната програма – вклучително и збогатувањето на ураниум – на претстојната средба со Франција, Велика Британија и Германија, најави денеска иранскиот министер за надворешни работи Абас Аракчи, пренесе Ројтерс.

Средбата е закажана в петок, а ќе се одржи во Истанбул, со цел повторно да се разгледаат можностите за дипломатско продолжување на замрзнатите преговори.

„Иран отсекогаш бил подготвен да ја развива својата нуклеарна програма поразумен, транспарентен и логичен пат, со цел да ја увери меѓународната заедница дека нашите намери се исклучиво мирољубиви“, рече Аракчи во видео-порака.

Преговорите со таканаречената „ЕУ тројка“ – Велика Британија, Франција и Германија (Е3) – беа договорени по предупредувањата од овие европски сили дека доколку не се обнови дијалогот, Иран би можел повторно да се соочи со режим на меѓународни санкции. Токму овие санкции беа делумно укинати со потпишувањето на нуклеарниот договор од 2015 година, кој САД го напуштија во 2018 година.

Според претходно најавеното, разговорите ќе се одвиваат на ниво на заменици министри за надворешни работи, а очекувањата се да се постави рамка за повторно оживување на договорот и прецизирање на обврските на секоја страна.

Судбината на иранската нуклеарна програма и натаму останува едно од најчувствителните прашања во меѓународната дипломатија, а состанокот во Истанбул се смета за критична пресвртница во обидот да се избегне понатамошна ескалација на тензиите.

Share on Facebook

Tweet

Follow us

Save