Италија ја казни „Мета“ со рекордни 805 милиони евра: Фејсбук пристапувал до фотографиите на телефоните без посебна согласност

Италијанската Агенција за заштита на личните податоци ѝ изрече казна од 805 милиони евра на „Мета“, матичната компанија на Фејсбук, поради користење фотографии и видеа од телефоните на корисниците без нивна конкретна согласност, известува „Политико“.

Казната се однесува на функцијата „Camera Roll Suggestions“ на Фејсбук, која им предлага на корисниците фотографии и видеа од галеријата на телефонот што можат да ги додадат во своите објави.

Според италијанскиот регулатор, функцијата го прекршува националниот закон со кој се спроведува европската Директива за приватност и електронски комуникации. Ова е убедливо највисоката казна што досега ја изрекол италијанскиот регулатор.

Истрагата, започната во 2025 година, утврдила дека апликацијата бара една дозвола за пристап до целата галерија на телефонот, која опфаќа повеќе функции со различни потреби. Притоа, предупредувањето пред барањето согласност било премногу општо и не им овозможувало на корисниците да разберат дека ќе добиваат предлози за фотографии и видеа.

„Ако се даде во целост, овој вид дозвола ѝ овозможува на апликацијата да ја чита целата архива со фотографии на уредот, обично трајно, без корисникот или надлежните органи да можат да проверат кои информации навистина се користат“, се наведува во соопштението.

Регулаторот ја отфрлил и жалбата на „Мета“ за ненадлежност на италијанските власти во корист на ирскиот регулатор, образложувајќи дека правилата за приватност во електронските комуникации не го предвидуваат механизмот „едношалтерски систем“.

„Мета“ има рок од 60 дена да обезбеди посебна и јасна согласност за оваа функција, да објасни како функционира и како може да се исклучи. Функцијата мора да биде исклучена и по основно поставување, вклучително и кај корисниците кои претходно веќе дале дозвола.

Компанијата засега не одговорила на барањето за коментар, а има право да ја обжали одлуката.

Share on Facebook

Tweet

Follow us

Save