Кира Рудик: Нема да останеме сами, еден на еден со агресорот

Пратеничката во украинскиот парламент Кира Рудик ја коментираше одлуката за членство на Украина во ЕУ. Таа рече дека тоа е навистина историски момент.

„Од почетокот на војната вчера можеби беше првиот ден кога почувствував среќа и радост, како и многу Украинци. Важно беше да добиеме кандидатски статус. Вчера татко ми ми се јави и рече дека не знае што значи овој статус, но јасно му е дека имаме иднина, нешто на што можеме да се радуваме“, изјави украинската пратеничка.

Рудик вели дека добила пораки за поддршка во Брисел. Таа наведува дека Украинците ја почувствувале едногласната порака дека Европа сака да ги прифати под нејзино покровителство, не само како сојузник туку и како партнер. Украинската политичарка истакна дека ова е важна одлука на европските земји кои велат дека стојат покрај Украина.

„Нема да останеме сами, еден на еден со агресорот. Иднината што ја гледаме за нашата земја е заедничка, тоа е фантастично. Не можам да опишам колку сум среќна и колку сме мотивирани“, рече Рудик, додавајќи дека е свесна дека ќе бидат потребни многу години за нејзината земја да го постигне членството во ЕУ.

„Пред два месеци никој не можеше да замисли дека ќе добиеме кандидатски статус. Пред две недели најмалку 10 земји беа скептични и воздржани. Работите се случија и скептиците станаа сојузници. Политичарите се обединија и ги оставија настрана разликите во мислењата“, додаде таа.

„Кога се одржа гласањето во Европскиот совет, беше прогласена воздушна тревога низ Украина и Путин рече дека ќе го зголеми нивото на напади. Добиваме повеќе оружје и продолжуваме да се бориме на сите фронтови. Нема значителна промена во ситуацијата во последната недела, но по овој чекор на европските земји очекуваме Путин да возврати и да го зголеми притисокот“, изјави Рудик за ситуацијата со војната.

Share on Facebook

Tweet

Follow us

Save