INFOMAX.MK

Општина Струмица го има првиот Шелтер центар за згрижување на жртви на семејно насилство кој се потврди како добра практика и единствен таков пример во државата, објави на Фејсбук градоначалникот на Струмица, Костадин Костадинов.

– На денешната средба со претставниците на Здружението „Скај Плус“ кое е партнер во реализацијата на овој проект, разговаравме за работата на Центарот, а ме информираа дека во минатите 5 години колку што постои, тој им помогнал на околу 100 жени и 50 деца.

Покрај просторните услови, општина Струмица секоја година обезбедува и финансиска поддршка за негово функционирање и згрижување на жртвите.

Поддршката од еден милион денари планирани буџетски средства ќе продолжи и годинава со обновувањето на лиценцата и со надеж дека бројот на жртвите на семејно насилство ќе се намалува, а свеста за неговите последици ќе расте.

Шелтер центарот за згрижување на жртви на семејно насилство е само една алка во низата на социјални услуги коишто ги спроведува и поддржува општина Струмица, а кои ја ставаат на врвот меѓу сите општини во државата. – објави Костадинов на Фејсбук.