Кузеска: Еден од полицајците кои го пропуштиле Груби бил прераспределен на „Блаце“ по налог на Тошковски

Портпаролката на СДСМ, Богданка Кузеска порача дека полицијата не си ја завршила работата со бегството на екс-вицепремиерот Артан Груби од земјава. Според неа, на министерот за внатрешни работи, Панче Тошковски не треба да се гледа како на „херој, туку неспособен министер“.

Кузеска на прес-конференција откри дека не станува збор за пропуст на полицијата, туку, како што вели, координација за пуштање на Груби. Вели дека е скандал од епски размери.

-Првата вистина за која молчи Тошковски е дека целосно потфрлила контролата на Блаце, поставена кај кружниот тек, три дена пред бегството. Зошто Тошковски молчи дека тие полицајци немале насока и не знаеле кого треба да чекаат и провераат? Дали намерно се оставени без никаква насока, рече портпаролката на СДСМ.

За двајцата полицајци на ГП „Блаце“ кои го пропуштиле Груби, Кузеска рече дека еден од нив, лицето Б.Ј. е службеник поставен на позицијата откако Тошковски станува министер.

-По налог на Тошковски, Б.Ј. е прераспределен на контрола на граничен премин, иако претходно извршувал друга работна задача неповрзана со контролата на граничните премини. Ова значи дека човекот кој што го пропуштил Груби е негов личен избор за таа позиција. Го прашуваме Тошковски дали е вистина од овие причини, за да може да врши вакви дејствија, Б.Ј. е поставен на оваа позиција, праша Кузеска.

Според неа, полицаецот земал боледување, истиот ден кога го пропуштил екс-вицепремиерот.

-Со тоа не може да биде суспендиран, се додека му трае боледувањето. Зошто Тошковски лаже дека се суспендирани кога тоа не е направено? Дали сака да го заштити или чека да се забошоти целата ситуација? Зошто не е поднесена кривична пријава против полицајците, туку наводна суспензија кога станува збор за дело за кое може да се поднесе кривична, истакна портпаролката на СДСМ.

Share on Facebook

Tweet

Follow us

Save