Лавров по инцидентот со авионот на Зеленски: Не исклучувам провокација по примерот на атентатот на Франц Фердинанд пред Првата светска војна

Рускиот министер за надворешни работи Сергеј Лавров не ја исклучи можноста Западот да се обиде да организира провокација слична на атентатот врз надвојводата Франц Фердинанд во Сараево, кој се смета за повод за почетокот на Првата светска војна, пренесе ТАСС.

„Но, постои и можност за повторување на тригерот што доведе до Првата светска војна. Условно – надвојводата Фердинанд во Сараево. Нешто слично може да организираат, имајќи ја предвид склоноста на Европејците кон интриги и авантури, нивната снаодливост? Или палењето на Рајхстагот? Не исклучувам нешто слично на тоа што сега го измислија со овој дрон во Лајпциг и кренаа хистерија во целиот свет, без да презентираат ниту еден доказ“, изјави Лавров во емисијата „Големата игра“ на Првиот канал.

Лавров потсети дека, според него, слична ситуација се развивала и околу Буча. Тој тврди дека руската страна не добила одговор на повеќепати поставуваното прашање во врска со инцидентот во април 2022 година, кога „одеднаш, како од ништо, беа прикажани десетици тела, уредно распоредени покрај патот“.

„И денеска не можеме ниту од генералниот секретар на ОН, ниту од комесарот на ОН за човекови права, ниту од нашите западни соговорници, вклучително и Американците, да добиеме одговор на прашањето: можете ли да ги искористите вашите можности и да добиете список на луѓето чии тела ги прикажа екипата на Би-би-си, која многу навреме се нашла таму? Никој ништо не ни одговара“, рече Лавров.

Тој додаде дека, според информациите што ги добива руската страна, роднините на жртвите наводно не сакаат да зборуваат за случајот.

„Но, никој не слуша ништо за нив. Не може десетици луѓе масовно да бидат убиени, да бидат извршени воени злосторства, а ниту една иницијативна група на роднини да не се појави. А овде владее целосна тишина, па затоа не ја исклучувам можноста за провокација“, заклучи рускиот министер за надворешни работи.

Share on Facebook

Tweet

Follow us

Save